炻板燒 (已搬遷) 新店位置

入到屯門睇完戲，搵下附近有冇黃店。發現有間好吸引嘅石燒牛肉，就不如一試啦！鋪內掛滿打氣卡牌，餐牌亦有心思整理過，值得一讚！！板燒一開始有牛脂開爐，避免牛肉痴底， 未燒之前經已充滿牛香味。叫咗兩個set，第一個係日本和牛板燒套餐跟飯包味噌湯。和牛油脂足夠，肉質軟淋，值得一試。味噌湯夠味，海帶蔥花配合得好，白飯上既飯素好嘢味。最抵讚嘅係點牛肉嘅醬汁，芝麻香加埋日式醬油令牛肉有不同嘅層次。第二個set係吉列牛板鍵套餐，唔鍾意太過油膩嘅朋友可以試吓呢個，相比之下呢塊就油脂較少亦較平均。鍾意一口牛嘅朋友絕對係你嘅首選，有炸粉嘅外層，亦令石燒牛增加不同既層次。本人十分推薦呢隻！食完咁多肉嘅晚上就以一杯清淡嘅凍檸茶作結。特別想稱讚店員嘅服務態度，雖然店內比較繁忙，但依然照顧各個食客嘅需要，如果有機會再入呢區都會再次幫襯！