兄井宅日本料理 (已結業)

其實我同老公成日都幫襯呢間日本小店。終於的起心肝幫佢寫一篇食評。話說放工非常肚餓啦。老公揸車去到水街特登嚟食呢間小店。果然係冇失望。叫咗個二人餐＄200有找，仲要飽到喊！好好味。有圖有真相啦。跟餐嘅沙律份量都幾夠大，而且好新鮮。第一味係魚生。三文魚腩入口即溶。鮮蝦好新鮮。份量都幾夠多嘅每樣有四件。跟住就上壽司呀。每款有兩件一共四款，最深刻印象係北寄貝。我不嬲都麻麻哋北寄貝，但係呢個呢真係彈牙。跟住就係我最愛嘅帶子，好新鮮！餃子都係即刻煎嘅，熱辣辣好好味。而且裏便嘅餡料係好多汁。最後，上埋呢個咖喱飯。二人餐來講，真係好多嘢食！仲有個面史湯我都冇影到相。呢個咖喱飯真係有不得了喎。個吉列豬扒呢，又係即刻炸！非常新鮮脆博博。日本飯又有咬口好煙韌。日式咖喱非常濃郁啊。今日星期五晚，可能啲人出晒街，比較清靜。食客各自為政。有種好舒服嘅空間感。店員有禮貌服務殷勤。依種舒舒服服食夜晚飯嘅感覺，真係好難喺香港搵到。一定會繼續來幫襯！其實有時，星期日都想落嚟食吓。不過佢好似又唔開喎。所以今日特登撞正個平日落嚟食。咁好服務仲要冇加一服務收費真係抵啦。