Wingman (已結業)

成日都聽friend講有一間雞翼放題嘅餐廳，但係講咗咁耐終於而家先去。旺角呢間好似仲係新開，星期六黎超級多人，晏晝仲要排隊，睇嚟應該都真係幾好食。坐低冇耐啲侍應就好用心咁樣介紹餐牌上嘅嘢食，我哋兩個人就嗌左一個二十四隻雞翼套餐，仲有兩款配菜，兩個人食真係超級飽，基本上食唔晒。淨係講佢啲雞翼先，上菜都幾快，而且仲會介紹邊份雞翼係咩口味。雞翼有分乾身同濕身，個人覺得濕身嘅比較好食，乾身嗰啲就話食落去就有啲熱氣。啲肉質夠晒滑，又唔會好鹹。配菜我哋就嗌左黑松露薯條同牛油果，黑松露薯條屬於幼身個種，黑松露嘅醬好香，用黎點雞翼都仲得！牛油果上面就有少少black pepper, 牛油果都好熟好軟身。