螢壽司 (已結業)

日式放題就食得多，但係今次黎到銅鑼灣Sogo後面嘅螢壽司，試下散叫嘅日式夜宴質素會如何。餐廳嘅佈置擺設都相當高尚有品味，餐牌亦有不少選擇。我地亦都唔客氣，即係order左好多野食。先黎一個特上刺身拼盤。吞拿魚腩，三文魚腩油脂分布相當有平均，真係食得出有魚油嘅香味; 牡丹蝦亦相當大隻，啖啖肉，蝦膏亦好多; 魷魚亦相當彈牙爽口，非常之好食！之後我地都order左一份特色壽司拼盤。蔥花吞拿魚腩花之戀係我嘅最愛，平時嘅花之戀只係得三文魚再加啲沙津醬。呢度嘅做法係添上蔥花，令吞拿魚腩同埋三文魚味道更香！甜蝦海膽亦相當之新鮮，食完之後真係大滿足！！壽司之後，繼續都係壽司。鵝肝，鰻魚雖然都唔係咩平價貨式，但係呢度確實物有所值！厚切嘅鵝肝同埋鰻魚，經過火灸之後，非常之香！！之後仲叫左兩份熟食。6成熟嘅安格斯牛扒同埋同埋照燒雞串，牛扒煎得啱啱好，肉質鮮嫩; 照燒雞串亦同樣出色，秘製嘅燒汁令味道昇華！！最後就叫左呢個甜品拼盤。香桃味雪糕本身已經不平凡，而最特別之處就係看似平凡嘅布甸食起黎相當之細滑，平時出街食到嘅布甸，質地普遍都偏硬，但係呢個焦糖味布甸literally如鮮奶一樣咁滑，真係極大滿足！！