煮角 (已結業)

因為有事要嚟到長沙灣，所以專登搵下長沙灣有咩餐廳，見呢間係新開，又見d人食評寫得咁好，所以嚟食晚飯，但我食完後又唔覺得有幾好味，只係普普通通，唔算得上係好味。二人叫了小食意式白酒煮蜆$38，芝士蒜香焗茄子$24，原味肉醬芝士焗薯皇$24，主菜龍蝦汁野菌海蝦天使麵$45，黑松露深海紅蝦意大利飯$48，甜品北海道3.6魔鬼奶凍$22，鬼爆食泥$24。二人總共食了$229。意式白酒煮蜆，湯無白酒味，得個味精味道，蜆殼多過肉。焗茄子，好有蒜頭嘅香味，但就無芝士味，望到望唔到d芝士，可能真係落咗好少芝士。薯皇，ok好食，夠脆，今次真係有好多芝士喺面頭，但肉醬又少咗d囉。天使麵好咸，唔似龍蝦汁，唔知係咩汁，配菜有野菌，豆角同蝦。意大利飯煮得幾好，唔會有一舊舊嘅情況出現，有兩隻大蝦，配料都係野菌同豆角，飯名有黑松露，但黑松露一dd都見唔到有。魔鬼奶凍其實係朱古力味，朱古力味同北海道牛奶味都幾重，而且奶凍都幾大分。鬼爆食嚟，其實就係木康布丁，不過面頭就加咗oreo碎，nut同爆炸糖，所以食落口感幾得意，但已經唔係第一次食呢種甜品，所以已經唔覺得有幾特別，但都算幾好味嘅。