Le Viet (已結業)

係旺角行街，見到呢間野嘅價錢唔算太貴，而且又幾大份，就同朋友決定係度食午餐。越式小食拼盤有扎肉蒸粉包、炸蝦餅、炭燒豬頸肉、越式春卷，份量都好足夠。扎肉蒸粉包同春卷不過不失，蝦餅相對炸得幾好食，蝦肉好彈牙，一D都唔粉，而個豬頸肉就炸得有D燶。大蝦菠蘿飯本來以為炒飯份量唔多，淨係得個面個層，但原來個菠蘿刮得好深，所以裝左好多飯。蝦好大隻兼幾鮮甜，而且蝦肉部份已經剝左殼，唔用手剝，好細心！香茅燒木綿魚呢個魚要等40分鐘左右製作，但食落幾有驚喜。魚好大條，非常多肉，而且幾乎無骨，口感十分軟滑，醃得好入味，味道係偏鹹，亦帶有幾重嘅香茅味，但係個種鹹味係可以接受嘅程度兼且我覺得係幾好食。越南綠豆拉椰糕本來以為係凍，點知係剛剛蒸熱上檯，個質感好黏，幾難切開，味道都幾甜。