火間土 (已結業)

夜晚十點幾嚟到無乜人，安排坐窗口位，個view的確幾靚，不過文化中心有幢嘢遮咗部份景，有d失色。食物上枱時嚇我一跳，份量少得可憐，魚生飯個碗比平時食飯碗大小小，價值120蚊，收咁嘅價錢真係有d過份。螢光魷魚，落單時待應已經講明略腥，不過朋友推介即管試吓。食落鹹鹹哋，口感幾得意，又唔覺好腥，可以接受。三色魚生飯(帶子、三文魚、海膽)，海膽唔新鮮，三文魚普普通通，帶子鮮甜，不過切得太薄。鉄板牛肉排略熟，有小小嚡口，味道不錯。串燒牛舌好味，叫咗兩轉，比較鍾意呢種有咬口嘅牛舌質地，上枱最好盡快食，凍咗會較韌。生蠔味噌燒，味噌似乎混咗沙律醬，味道搭配，唔會蓋過蠔嘅鮮味，值得一試。