漁獲浜燒 (已結業)

第二次黎呢間餐廳，都好滿意。因為除左好食，呢度既服務好好。我地叫左個沙津同清酒。幾開胃，唔錯。清酒都算幾易入口，價錢又唔貴。之後老公叫左個五色刺身拼盤，第一次食牡丹蝦，估唔到咁好食，好鮮甜。三文魚亦係超水準，唔會有雪味。之後既浜燒海鮮盛合係我最鐘意架！兩隻西非蠔好脆口，燒得岩岩好，香得黎唔會乾水。蠔身好重海水味。蟹腳一絲絲肉，又甜又新鮮。d帆立貝大到好似我隻手掌咁，啖啖肉。鮑魚就新鮮到燒緊個陣都仲會郁。珍寶蝦又係又大又好食。老公知我鐘意食甲羅燒，所以叫多兩隻。哇！甘香都傻左，好正！甜品雪葩聲稱都係日本來貨，好香桃味。晚餐期間有一段小插曲令我對呢間餐廳加好多分—— 我地張枱可能枱腳有問題，有少少搖下搖下，幫我地燒海鮮個位waiter 見到搖左一下，就即刻出去搵左個waitress 黎拿紙攝一攝枱腳。之後我地講笑咁問個waiter 頭先個waitress係咪專幫人攝枱腳？個waiter 話：因為有女食客，所以搵番waitress落枱底攝會方便。我心諗：洗唔洗咁細心？😏一見到枱有小小問題就即刻搵人攪，仲會考慮埋食客感受，抵你客似雲來啦！