鮮一夜火鍋 (已結業)

一向都鍾意食雞煲嘅我們，今次去到荃灣大廈上面，去任飲任食放題火鍋雞煲專門店-鮮一夜火鍋試吓。餐廳環境空間好大，而且大多數以卡位設計，所以我哋四個人被安排坐窗口嘅卡位位置，坐得非常舒適。醬料同埋飲品都係以自助形式供應，仲有自家製涼茶任飲。一個價錢就有成個套餐，套餐中包括刺身、燉湯、鮑魚、牛肉、雞煲、海鮮拼盤、湯底、火鍋配料同埋甜品等等，非常豐富。刺身拼盤多款式，而且味道非常新鮮，特別係三文魚刺身，魚嘅條紋非常平均。雞煲肉質鮮嫩，而且好入味，小小辣好滋味。另外，最欣賞就係養顏花膠翅燉湯，真係原個燉盅上，而且原汁原味，味道非常鮮甜。食完雞煲就可以轉火鍋湯底，我哋就選擇咗鴛鴦湯底，藥膳養參鍋同埋重慶麻辣鍋，一次過可以滿足兩個願望。湯底飲落去非常鮮甜，重慶麻辣越煲越辣。另外火鍋配料以自助形式供應，而每一台都有一盤新鮮嘅海鮮拼盤，當中嘅海蝦非常新鮮，食落去爽口彈牙，好好味。除此之外，仲有各式各款嘅甜品🍮，雪米糍同埋雪糕球，而且有多款口味，食完非常滿足，好豐富嘅一餐晚餐。