泰屋

营业中

休息中

我鍾意食濃味重口味嘢，泰國咖喱啱晒我，朋友帶我去食泰式咖喱農夫包，未食已經好期待。醃肉碎生菜包$85先來個小食前菜，呢個生菜包肉碎好惹味，少少辣，少少泰式香茅香料味，加上一啲紫洋蔥，用爽口生菜包住食，好開胃。農夫包咖喱軟殼蟹$208呢個有個小插曲，本來我哋係叫農夫包咖喱焗海鮮，但係佢上菜上錯咗，不過唔緊要啦軟殼蟹我都鍾意食。講返個賣相先，好吸引，咖喱金黃色加上農夫包圓轆轆脹卜卜，上面鋪滿軟殼蟹。軟殼蟹好大隻，炸得香脆，炸粉薄薄，裏面啖啖蟹膏蟹肉。農夫包焗得外脆內軟，沾上咖喱蛋花醬汁，好滋味，咖喱香濃，又有椰奶香滑，好邪惡但又好好味。原個椰盅海鮮焗飯$88呢個有驚喜，白雪雪嘅椰汁望落驚會膩，但係原來個味幾清新，充滿椰汁清香，配炒飯一齊食真係忍唔住一啖接一啖係咁食。成個焗飯裏面材料豐富，海鮮有青口、大蝦、魷魚，海鮮都新鮮，蝦肉幾爽口，魷魚就爽滑。炒飯有啲蔬菜配料，仲有啲清新爽滑嘅椰子肉添。芋頭糕$13/件雖然已經好飽，但係都要食返個甜品，呢個芋頭糕係熱食嘅，芋頭粉糯，加上椰汁清香，質感有啲煙韌軟滑，唔太甜幾好食。