雲來點心火鍋菜館

今晚約左兩位舊同學聚舊﹐諗住去旺角泉章居新店﹐點知原來未開張﹐要聽晚先開﹐真係無奈。結果經過雲來﹐其中一位舊同學話不如呢間﹐我心裡面打個突﹐因為我幾年前食過一次﹐印象非常麻麻﹐不過我又係諗住“即管睇下你有無改善”結果一行三人上去幫襯。
位依然好逼好窄﹐如果四個少少肥的人坐4人檯﹐應該會食得好辛苦﹐不過好彩我地只得3人﹐亦唔算肥﹐所以﹐勉強OK啦。望下餐牌﹐茶錢醬料錢依舊係每人計﹐未食已經要收每人30幾蚊﹐另加一碟$12的所謂小食﹐計埋加一即係你未點菜已經要每人$40幾蚊﹐
變相黎講亦係等如最低消費﹐你就算有本事淨食辣醬飽都係要收你$40幾蚊。
叫左沙嗲湯底鍋$48﹐基本上入面咩都無﹐真係淨係沙嗲汁+湯。而火鍋料無錯的確係$10 碟﹐但唔係全部﹐有不少款式都係$28~38不等﹐要另叫。三個人叫左約15碟﹐食晒都唔覺飽因為份量的確係少得可憐﹐$10 肥牛只得約3~4小片﹐其實叫多幾次同出面$40 碟可以
話無分別﹐不過最近我因為某種原因暫停食牛肉﹐所以淨係我兩位舊同學分都勉強OK﹐每人有“兩小片”。
另外﹐生根$10 5個﹐出前一丁$10 一餅﹐魚片$10約7片﹐蘿蔔$10 約10小片﹐其實計落絕不算平﹐只係將份量減少再便宜一點賣吧。
服務非常一般﹐衛生更可謂“差”﹐因為進食途中見到地下不只一次有“小小強”爬過﹐不過為免同學們失去胃口﹐我只當無事發過吧。
3人食到7分飽﹐埋單$320﹐除開都要$100 以上一位﹐計落都係去其它地方食$69~89的任食火鍋比較化算。而結論係﹐無甚麼大改善﹐價錢依舊地不便宜﹐實在無原因要我再幫襯了。