福丸水產 鉄板燒 日本料理 (已結業)

食過福丸水產，一直念念不忘。呢間店可以話係平民恩物，因為唔係處於旺區，可以用較為親民的價錢食到高級日式濱燒。除咗地點唔夠便利之外，其實店內的環境都好優雅，絕對唔俾高級的日式居酒屋輸蝕。食物選擇多，而且整體價格都幾相宜。先點兩客小食醫下肚仔。明太子玉子燒甜甜地好開胃。七味魚翅就最啱配清酒。難得入到荃灣，當然要食豪啲，刺身揀咗高級刺身拼盤外，亦加左一隻龍蝦刺身。整體質素都幾高，新鮮又唔腥。最鍾意拖羅，入口即溶，而且無筋。海鮮濱燒當然係重頭戲啦！帆立貝厚身又大隻，而且洗到白雪雪、好乾淨。大蝦夠晒厚肉，肉質有彈性而且夠鮮味。除咗海鮮以外，燒和牛亦都係當晚的大驚喜。賣相超級靚，和牛用岩鹽版呈上，而且用微火溫熱。牛肉入口即溶，脂油味豐富。配上少少蒜片，簡直係人間美食。銀雪魚西京燒都係我的最愛，魚肉極嫩滑，而且甜甜地，好惹味。臨尾來個壽喜燒，為精彩的晚宴畫下句號。整體食物質素都幾唔錯，環境又舒適，最值得欣賞係價錢比起銅鑼灣同級數的美食起碼平左三份一！