Steak Bar (已結業)

三個人星期日做嘢做到過哂食飯時間，攰到七彩又餓到七彩，真係要搵啲啖啖肉嘅嘢黎減吓壓。食肆限坐好彩放鬆左，可以最多四人一枱，如果唔係三個人都唔知點搵食。黎到Steak Bar，咁夜都滿滿哋座，不過唔駛等位可以即刻入去。即刻睇下個set  menu。要食啖啖肉，少肥肉，重肉味，所以搵左澳洲黑手安格斯西冷，而有個同事就話要試下每日限量嘅頂級板腱牛扒。首先黎嘅係頂級板腱牛扒，成個套餐上有埋前菜、沙律及有加左味素嘅白飯。就咁望落去都幾大件，好吸引，於是水個同事切一舊黎試下。另外仲有加錢加左幾杯飲品同薯條，不過無咩特別就唔影相。切開啲肉色都唔差，不過食落去就⋯⋯好有嚼勁，超多筋⋯⋯少少筋其實我都得嘅，仲有啲咬口，但係哩個真心多得滯，係𡁻完唔想吞嗰隻。不過可能個同事好餓，或者佢又唔介意多筋，佢食清碟嘅。隔一陣就黎我個西冷。賣相都係OK，叫左五成熟，切開睇落都唔錯。哩種外邊2-3成熟加埋入邊仲有流少少肉汁出黎嘅熟度我最鐘意。味道呢，都合格嘅，加少少鹽仲可以調出牛肉味。＄258一個西冷扒咁嘅分量其實都算係咁。