元気寿司 (已搬遷) 新店位置

裝修左一牌，最近開返，裝修後第一次幫襯。首先講下環境，依家响壽司帶旁加左幾組卡位，椅背夠晒高私隱度亦高。唔使同陌生人逼住坐隔離之餘又可以响壽司帶度攞嘢食。食物方面，叫左三份下午茶$39份，每份另加$9配多個手卷(任何口味除左最貴嗰兩個)。個餐要左E有五款壽司，有一件三文魚，燒三文魚，生蝦，北寄貝同埋三小件蟹柳卷。套餐跟炸雞件或炸草蝦或蟹子沙律另跟關東煮或湯烏東或日式炖蛋。我地要左兩個炸草蝦同一個炸雞件。全部跟關東煮。壽司揑得幾好，飯唔散。炸草蝦整到似炸蝦餅圓氹氹，不過都有條蝦尾。炸雞件熱辣辣肉夠滑唔會好似KFC咁乾到死。個手卷要左三文魚（原價$16) 紫菜脆，不過三文魚少左啲。總括黎講$39蚊幾抵食因為超市個啲壽司六件装都吾平得去邊又無咁大件又無咁好食。