橋底辣蟹 (雅閣大廈) (已結業)

有朋友從外地返來，突然提議去食避風塘炒蟹，我們二話不說便行去鵝頸橋，由街頭到街尾佢已經有三間鋪，但每間門口依然有一大班人在輪後，幸好原來佢係中央分配座位，所以如果新鋪有位佢都會安排你稍移玉步。等候時見到店員熙來攘往，將海鮮和菜由一店送去另一店，雖然有點不生，但也幾有趣。如果他朝有日佢可以好似玩大富翁咁兼併晒成條街鋪，佢就可以打通通道，而唔使好似而家咁頻撲。講到首本名菜，當然是炒蟹，雖然已經係叫小辣，但始終都係睇得到都已經知道熱氣，但為吃心頭好也理不得那麼多。本來想加埋碟瀨尿蝦，但一聽到侍應話百幾蚊一隻即刻嚇窒，於是轉為叫炒鴨舌，後來先知原來係有得叫例牌細隻的，蠢。不過碟鴨舌都好夠鑊氣，無得彈。最後當然唔少得一支無敵樽裝大可樂，配埋炒蟹簡直係人生一大快事。一碟蟹眨眼間己經食晒，我連碟蒜蓉辣椒都撈埋。但正所謂出得行，預要還，好快暗瘡菲芝已經標晒出，真係飲涼茶都補唔返。可能我會忍一陣口，話以後會克制，但過得一排我又會重蹈覆轍，不顧一切咁去幫襯。