鮮入圍煮 (已搬遷) 新店位置

呢排天氣凍，媽媽又鐘意食花膠，成日聽人講呢度個雞煲好正，終於抽到時間黎鮮入圍煮喇。環境睇落似街市，好親民，而且剛好六點黎到已經好多人。員工好體貼，可能見到我媽行動有點唔方便，就好友善主動甘安排我地坐靠牆位，未食已加分。🥘花膠雞煲（細）$238一坐低就點左個細既花膠雞煲，員工隨即係我地面前剪開隻雞，之後滾一陣就可以開食得啦。湯底雞味非常濃郁、鮮甜，我同媽各自飲左兩大碗先開始食。花膠厚實，數量算幾多，雞肉可能因熬關係唔太滑，但正因為甘先顯得真材實料。🐂芝士牛丸 $38好耐無食過牛丸，牛肉味濃，結實有彈性。要小心熱，因為一咬開芝士就流哂出黎，好惹味，咸左少許外都幾好食。🐂新鮮牛柏葉（黑毛肚）$78牛柏葉識食梗係食黑色啦！因為無經過漂白先係靚貨，食落爽脆彈牙。👍🏻新鮮田雞（隻）$22/1叫左兩隻，超級新鮮，食落超級清甜，超好味，必食😍。記得睇時間食，太熟就無甘滑架啦😝。🍴鮮淮山 $35爽滑既口感，有營養價值又好食。🍴皇帝菜 $35皇帝菜洗得乾淨，夠新鮮食得放心。