甜入心 (已結業)

每次出席朋友嘅晚飯聚會過後, 總會去食埋個糖水先至散 band, 而今次都唔例外｡ 原本我地係去近黃金嗰頭嘅甜品店, 但已經見到有好多人等, 所以朋友就提議行遠少少食｡ 估唔到行遠 D 就真係有 Surprise, 店面雖然唔大, 但個裝修都幾靚｡ 打開 Menu 第一頁已經令我心心眼  , 因為有我最鐘意食嘅椰皇系列, 所以我好快就已經決定到食咩喇 !!焦糖布甸椰皇子估唔到呢款可以揀熱食, 宜家天氣咁凍, 我緊係揀熱食啦｡ 個椰皇熱辣辣送到上黎, 見到個布甸喺個椰皇入面震震下, 真係忍唔住即刻食一啖｡ 布甸好有蛋味, 口感好滑, 但焦糖味就唔係好夠｡布甸下面係椰汁果凍, 可能係熱食嘅關係, 個果凍嘅椰汁味特別濃, 超級好味｡ 如果布甸、果凍 & 椰汁一齊食, 就會感受到多重口感｡總括黎講, 同行朋友都話佢地所點嘅甜品好好味, 所以下次我地都寧願行遠D再幫襯｡