獅叔 (已結業)

行經波鞋街個商場，係佢地下果層聞到好勁、但唔知係蝦醬定蝦湯味。上去一樓買完野時發現有間新既星馬菜餐廳，聽店員介紹原來只係開左幾日，樓下聞到果陣味係佢地煮蝦湯既味。聽佢咁講完，就入去坐低食個lunch。佢地都有lunch set, 有叻沙、檳城蝦麵、炒棵條之類既typical 馬拉野，另外有幾款唔係好常見到既，不過忘記左影個menu。比個蝦湯味吸引左我興趣，所以點左個檳城蝦麵加杯龍眼茶，$72。蝦湯的確出色，好濃既蝦味，但個湯又好清香，唔係死咸果隻，麵既份量都足。今日個肚唔太舒服，未試杯海南茶，下次有機會再試。