喜滿樓菜館

营业中

休息中

喺高山劇場睇戲，順便喺附近食嘢，呢間餐廳睇落幾傳統亦有懷舊feel，但係好多菜式都幾特別，基本上都坐滿晒，聽落好多都好似係熟客。佢哋標榜少鹽少油，但做出嚟嘅菜式都好有水準。薑汁炒芥蘭，芥蘭煮得好爽甜，食落唔會有渣。蜜椒脆鱔球，鱔球切得夠厚身，炸得好脆口，有一陣薄薄嘅蜜糖面，咬落去後係仍然保持肉汁嘅鱔肉，鱔肉亦十分彈牙，加上微微嘅黑胡椒粒，口感層次豐富。惹味南乳脆豬手，一口咬落去好有驚喜，豬皮乍得脆脆地，但豬手肉汁保存得10分好，加上佢哋自家製嘅南乳醬，配合得10分好。黃金脆涼瓜，我最欣賞佢嘅鹹蛋黃好黐實涼瓜身上，而碟底幾乎見唔到有油，炒得乾身之餘亦應該用咗比較少油，鹹蛋黃加唔算太苦嘅苦瓜，味道亦10分有層次。食咗咁多個熱氣野，飲返啤酒降下火，食得更加滋味。