正宗水上人氣鍋專門店 (已結業)

一直想試蒸氣火鍋，但無奈海鮮真係食唔飽，今日有朋友請於是試吓呢間食評唔錯嘅蒸氣火鍋。問口招牌搶眼，職員帶我哋四人到三樓嘅大圓枱就座。店內抽風系統唔錯，唔會焗，而且地方闊落。論食材新鮮味道幾好，而且職員有禮貌，我哋有問題佢哋會耐心講解，雖然真係唔係咁飽，但係呢兩個鐘嘅晚飯好滿意。我哋揀咗套餐B同半隻蟲草花蒸鮮雞。好多醬汁配料。粥底係南瓜豬筒骨，like & share facebook專頁每人送五隻海黃蜆5隻，蜆有少少沙，有一兩隻係無開口，一打開入面全部泥。大大隻扇貝同蟶子。花蛤皇，鑽石蜆，胭脂蚌。三樣都唔大隻，中規中矩。黃金汁蟶子皇，上面嘅汁係用紅色燈籠椒打成，有啲啲辣味。黑松露蒸元貝同貴妃蚌。元貝有啲淡，貴妃蚌好味，有金菇碎唔太濃又特顯到鮮味。南非龍蝦及花蟹仔。職員將龍蝦放入去蒸嗰陣龍蝦仲識旭，兩樣好鮮，有膏肉都唔少，肉質彈牙。雪花和牛，欖菜肉崧冰菜。和牛好香油但唔漏，欖菜令清淡嘅菜更有特色，兩樣我都未試過用蒸嘅方法食，好味，不過菜嘅份量太少。蟲草花蒸鮮雞，雞好滑，職員話無用調味料。最後加上脆脆嘅粥，好濃嘅湯底，啲粥好有味。