本來諗住係食 Lunch, 點知變咗食 Tea...
正如好多位既食評所講, 佢既服務同態度真係... 令人刮目相看!
大概1:15去到門口, 由於佢上晝1:00收爐, 職工用膳, 所以下晝要2:00先開, 店員阿姐叫我地 2:30先好返黎,
因為朝早果輪唔會咁準時走, 驚執唔切檯, 於是我地响附近行下d古蹟, 差唔多2:00鐘倒, 返去等佢開門....
返到去已經有一班人响到等緊, 嘩! 咁多人, 睇佢裡面既環境, 無可能坐得晒㗎喎... 咁物要等第二輪?!
無計啦, 一場黎到, 唔通唔食就咁走咗去....
點知, 原來前面果班人係一齊黎㗎... 可能係 local tour... 即係話, 佢地無可能逐d食完逐d走, 一定係等埋一齊, 一次過走...
所以我地要等三十幾個人食完然後走, 我地先有得食.... OMG!
到咗 3:00, 嘩! 奇景出現... 有個人响條村到拎住將四方檯行埋黎, 同d阿姐交待幾句, 話係邊個邊個既仔,
然後响個空位到放低將檯, 攞埋凳, 叫咗5大1細埋去坐...
呢5大1細絲絲然咁坐埋去, 完全莫視我地呢班等緊位既人....
店員亦都對排緊隊既人視若無睹! 果然係勁! 唔通下次要自己帶檯同凳黎食野???
(如果有下次嘅話...)
排緊隊既人當然氣憤啦, 但係又可以點?
跟住仲正, 十幾分鐘之後, 又有一男一女行埋黎, 揾倒個相熟肥阿姐傾幾句, 咁啱有一檯4個人走,
個肥阿姐就叫佢地坐埋去喇! 我地即刻同佢理論, 阿姐話呢2個人等咗好耐, 一早就黎咗㗎喇....
咁既大話都講得出, 果然係另一個勁!
等到 3:30, 終於等倒果班人走喇, 我地既 Lunch 有著落喇....
我地叫咗招牌菠蘿包, 招牌咸牛肉蛋多士, 蕃茄湯底豬扒麵, 檸多, 凍檸檬茶
[檸多, 凍檸檬茶]
檸多 = 檸檬加益力多: 普普通通
凍檸檬茶: 好! 茶有茶香, 檸檬又無苦澀味, ok 正
[招牌菠蘿包]
菠蘿包夠鬆軟, 皮脆, 裡面夾住牛油, 蕃茄同埋煎蛋...
個人口味啦... 覺得菠蘿包同蕃茄唔夾呀... 所以唔鐘意!
反而, 如果走蕃茄應該好味!
[招牌芝士咸牛肉蛋多士]
因為賣晒朱仔包, 所以轉多士...
呢個好味, 正! 蛋唔係10成熟, 仲有少少蛋黃流出黎, 配合埋咸牛肉, 正呀!
1
[蕃茄湯底豬扒麵]
雞翼賣晒, 所以只係叫咗豬扒...
個蕃茄湯底並唔係傳說中咁好食喎... 雖然有大量既蕃茄, 但係個味道調教得麻麻...
豬扒亦都唔係煎得好出色...
雖然華嫂份人好 nice, 但係如果要我尊登黎等個半鐘食呢幾樣野, 以呢個水準,
我自己就唔會再有下次...
一試係無防, 但係最好唔好揀假日黎試囉... 因為如果d村民, 阿邊個邊個個仔,
店員d親戚或者朋友, 都揀正假日黎幫趁... 我地呢d村外人就有排等喇!
