呢度嘅食法就好簡單但超滿足：一坐低先上招牌「至尊惹味雞煲」，辣度可以自己選擇，真係一上枱已經香到成枱人流口水，醬汁又香又濃，帶少少辣同椒香，但唔會死鹹嗆喉，雞件又滑又入味，食極都停唔到。最正係雞係可以任叫任添，食到你真係覺得夠先收手😆
清晒雞煲之後，店員會幫你加湯，原本濃郁惹味嘅雞煲就變成火鍋湯底，雞油同香料完全溶咗落去湯度，用嚟打邊爐一流，越滾越香又唔會覺得膩。火鍋配料選擇都唔少，由鮮牛、肥牛片、豬頸肉、粉腸、鵝腸，到魷魚、魚片、鮮蝦雲吞、韭菜餃，仲有大量丸類、芝士腸同oppa魚板，小朋友嚟都一定有嘢啱食；菜類方面蓮藕、娃娃菜、生菜等都夠新鮮爽脆，齋喺度試晒唔同配料都已經好過癮。
以大約$188一位晚市計，可以由惹味雞煲開波，雞件任添任食，再慢慢開爐打邊爐，配料款式多、質素又唔差，再加上坐得舒服、服務又夠貼心，成晚慢慢傾計、慢慢滾，埋單都唔駛二百蚊，真係好難唔推薦畀身邊人。
1
