喜鍋 海鮮‧火鍋‧小廚 (已結業)

去打邊爐，湯底選擇多嘅餐廳特別得我歡心，呢間位於油麻地地鐵站附近嘅喜鍋，有成18款湯底俾你揀， 搞到我哋掙扎咗好耐都唔知揀咩好。最後決定要花膠鯊魚骨膠原湯，呢個湯飲就飲得多，用嚟打邊爐就真係未試過。乳白色嘅湯底調味恰到好處，自然清甜，帶有膠質，好養顏啊！湯水好味之餘，仲非常足料，花膠煲到腍晒，襯未開始打邊爐我已經飲咗好多碗啦！一檯美食有牛坑腩、牛頸脊、珊瑚蚌、手打墨魚丸...牛頸脊係牛身活動量最多嘅部位，口感爽滑，肉味香濃，切成薄片淥一淥就食得。牛坑腩每一塊都帶點牛筋同牛脂，食出肉質腍、牛筋爽、油脂香。珊瑚蚌淥得太耐就會變韌，灼一灼就最鮮味爽口啦。手打墨魚丸Q爽彈牙，讚啊！壓軸仲有香脆可口嘅脆米泡飯，加入湯底，米粒吸取曬湯嘅精華，滋味倍增！