潮州人 (已結業)

見到餐廳支持學生去發夢，梗係要支持下去食。鋪頭大概廿個位左右，格局都幾溫暖舒服， 賣嘅食物只有十來款 ，以平民價賣有質素的海鮮，全部唔係湯飯，就係米粉。我哋揀咗清酒煮蜆米粉同埋廣島蠔米粉試下 ，大蜆鮮甜多汁，肉質細嫩，食得出係即日買嘅海鮮。廣島蠔有四隻，隻隻都肥肉飽滿。米粉嘅湯雖然只有簡單調味，但就正正係咁，唔會蓋過海鮮嘅味道。如果略嫌單調，可以加檯面放置的潮州辣椒醬。加十二元加支自家制龍眼花旗參蜜，甘甘甜甜解熱氣一流。單係食物已經值得支持，何況係為公義嘅良心店舖。