第三站

今日去咗旺角行街睇戲,睇完戲有啲肚餓想食少少嘢,上OpenRice望吓附近有咩好推介，喺戲院附近金雞廣場有間樓上Cafe都幾吸引於是去試吓。第三站 cafe 地址喺洗衣街39號金雞廣場25樓。上到去舖頭非常整潔，一大片落地玻璃環境好舒適。黑松露帶子鮮菌燴意大利飯 122 元，意大利飯賣相好吸引，黑松露嘅香味完全滲晒落啲飯到，而且意大利粉煮到啱啱好軟硬適中，每啖都食到元貝嘅鮮味，同埋雜菌嘅香味，幾樣嘢配搭得啱啱好。煙三文魚野菌忌廉燴闊條麵 126 元，煙三文魚色澤好新鮮，而且仲好大片食落去好有口感，加上有少少魚油脂肪，味道更加香，闊條麵全部都沾上忌廉汁同香菇味道，味道層次好豐富。田園沙律份量雖然少啲，但係沙律菜好新鮮好好味。芝士火腿飛碟 38元，啱啱焗出嚟嘅火腿飛碟好香，芝士味香濃，而且做到拉絲，麵包焗到啱啱好，熱辣辣真係好好食。藍莓芝士蛋糕 藍莓味好香甜，配搭埋芝士蛋糕味道真係好正。荔枝綠茶 荔枝味香甜夠晒解渴，喺咁熱嘅天氣飲番杯冰涼嘅嘢飲真係好舒服。呢度最岩三五知己傾吓計，行完街休息吓食少少嘢，真係好方便又好味。