點心到 MIX·大排檔

营业中

休息中

之前去過油麻地一間食點心嘅餐廳，感覺都唔錯。最近發現佢哋喺旺角都開咗分店，而且晚市仲有小炒，所以今晚我哋就去咗食晚餐啦。🔸韮菜鴨血自從冇得去旅行之後，大家都愛上左喺香港食鴨血。估唔到今日唔係去台式餐廳都一樣有鴨血食。呢度嘅做法係潮式嘅做法，鴨血再加上韭菜。鴨血都幾大件，夾起唔易散，食落口感都幾滑。🔸飛天通菜煲炒通菜嘅味道惹味，口感爽脆。上枱嘅時候仍然保持出晒煙熱辣辣嘅溫度，但係啲通菜都唔會煮得太老，而且份量都幾多。🔸冰鎮咕嚕肉呢個咕嚕肉做得非常出色，佢係冰鎮嘅做法，生炒骨仍然係暖暖地嘅溫度，但係表面接觸過冰塊，所以外皮已經變得凍，但同時令到口感變得鬆脆。加上味道酸酸甜甜，要嚟餸飯就啱晒，真係非常推介大家試吓。🔸黑金流沙包、卡通流心芋蓉包我哋最後一人叫咗一個包，卡通流心芋蓉包個樣真係非常可愛，有笑哈哈嘅造型，見到都已經夠晒開心。芋蓉嘅味道非常突出，口感都好滑。至於黑金流沙包就係奶黃口味，食嘅時候已經冇流沙嘅效果，但係味道都唔錯。