焱丸水產 (已結業)

唔經唔覺，家姐嘅生日又到喇，今次我呢個乖細佬，決定帶佢去一間我哋好中意嘅餐廳，銅鑼灣焱丸水產去賀一賀佢！食燒物之前，先食個麻醬番茄豆腐沙律，沙律有凍豆腐粒、番茄片同最緊要嘅日本麻醬，好fresh又好味。下一個嚟個刺身三盛，分別有三文魚、帶子同油甘魚刺身，三文魚肥美、油甘魚冇渣又唔韌、帶子又爽口。跟著就係主角，一人一個甲羅燒，蟹味噌甲羅燒同南瓜蟹肉甲羅燒。呢個甲羅燒一定必食，將蟹子、鵪𪂹蛋、蟹膏撈好，之後開火燒，燒到好香，就加青瓜絲一齊食，蟹膏嘅香味，好食到不行了！下一個好特別，係餐廳是日推介，吞拿魚鮫，當廚房一拎出來個陣，好震撼，因為好大份，我哋慢慢拆肉，一啲都唔腥，因為太新鮮，好香魚味，真心推薦大家試下！最後一個，就係豪食龍蝦鍋，龍蝦鍋有一大隻新鮮而且有膏嘅龍蝦，仲有其他配菜，例如豆腐同鮮菇等等。食咗隻龍蝦之後，啲龍蝦湯先係精華，我同家姐都爭住飲！喺咁開心嘅日子，一定要飲小小酒，我鍾情巨峰燒酎而家姐就一定叫梅酒，細佬仔喺度祝願姐姐年年十八歲，青春常駐❤️❤️❤️