神屋流博多道場 (已結業)

於「周禮．天官．膳夫」一文中，有謂「珍用八物」，鄭玄註：謂淳熬淳母炮豚炮牂擣珍漬熬肝膋也。膋即腸脂，我國先民精飲食，已寫出腸脂的甘美，惟現代人以脂肪危害健康為名，將脂肪視同毒物，甚麼豬腸鵝腸，去膏而後快，脫膋腸子即如橡筋。韌並耐嚼，真不知我咬豬腸還是豬腸咬我。鵝腸更不用多說。歎之曰今謂之美食者已失其精髓！！有聞博多的牛腸鍋腸肥料足，老饕告慰。牛腸開邊切小段，清其污穢。膋衣腸壁，美哉！腸者耐火之物，先大火大滾，及後文火細燜，待腸軟滑。試味之道，先淡後濃，點個刺身，店員謂廚師推薦的才有榮螺，雖則貴少少也來一份試試。魚生每款只得三數片，但片片晶瑩，厚切鮮甜，薄切通透。榮螺入口鮮脆，咬口十足，過足口癮！問店員可否取其螺殼，店員即用餐巾包裹，這樣服務劉華都話得。食過刺身，再試牛腸鍋，腸脂溶入熱湯，蔬菜滿是油脂，色亮清甜。好！牛腸軟滑有嚼頭，又一妙品。食過牛腸，仍未飽。銀兩有限，點算？點個飯團頂頂肚。嘩，個魚子飯團份量及用料十足，魚子多，價錢公道。細食美女大可不用考慮，免得浪費！善哉！善哉！又是一個富足的晚上！