振興肉丸 (已結業)

真係孤陋寡聞，原來喺大埔起家嘅振興肉丸喺荃灣綠楊坊有分店。今日去荃灣探朋友經過綠楊坊即刻買返幾包返屋企震下個雪櫃。店舖乾淨企理款式多，除咗大家都食開鎮店之寶和牛肉丸類外，仲有很多冰鮮冷藏食物，我買左較新穎，又未試過嘅日式咖哩牛肉餃子，QQ豬肉丸。日式咖哩牛肉餃子唔算好大粒，不過咖哩牛肉味道超香濃，皮薄薄咬落都很有口感。QQ豬肉丸並不是QQ那麼細粒，只係比傳統嘅豬肉丸細粒少少，所以用來煮烏冬食時，份量都唔小。