生記飯店 (已搬遷) 新店位置

一行五人，三日前預訂左江南百花雞，要先落訂$1000，順便預留埋花雕蛋蒸龍蝦、蝦子油皮和泥鯭肉丸粥。八點入坐時服務員細心安排，加單嗌左必食嘅蓮藕餅、生炒骨，可惜枸杞豬潤已經賣晒，有點失望，叫咗椒鹽鮮魷，都係唔錯嘅選擇。經典菜式水準依然，蒸龍蝦要求用蛋白蒸，好睇好食，服務員推介將龍蝦頭起肉做個炒飯，其實有泥鯭粥都唔想嗌飯㗎啦，不過又唔想嘥咗個蝦頭，所以都嗌左一個小份量嘅炒飯，估唔到個炒飯仲出色過蒸龍蝦！第一次食江南百花雞，有點兒期待，可惜本人唔係太好雞皮，而呢道菜主要係蝦膠上面有塊雞皮，再加上期望過高，所以反而有一點兒失望，其他第一次嚟嘅朋友，都食得非常開心。順帶一提，前幾日都去咗荃灣嗰間生記，同灣仔呢間真係冇得比。