華香雞 (已結業)

華香雞，我細細個就聽過呢個名啦，不過之前屋企附近嘅執咗，最近先知觀塘有一間華香雞，咁就梗係搵日放工嚟食啦。一入門口就見到呢個好大嘅牌匾，唔單止靚之餘，仲好有中國風味。呢度嘅侍應姐姐仲好熱情咁幫我地帶位添。黎得華香雞，就梗係要食招牌嘅華香雞啦。我哋兩個人就叫咗半隻，睇落份量都好夠喎。雞肉食落好嫩滑，雖然佢配埋醬汁，沙薑醬同姜蓉，但唔使點已經好夠味啦。呢個椰子雞湯，真係成個椰子咁上嫁。入面唔單止有椰子肉，而且飲落一啲味精都冇，仲好飲過屋企自己煲嗰啲呀。椒鹽排骨又係好適合送飯，佢嘅排骨唔會太老，而且椒鹽好夠味，令人想食多幾碗飯啊。呢個麻辣牛筋腩好香，但係又唔會太辣，適合啲唔係好食得辣嘅人。佢嘅牛腩煮得夠林，大人細路都啱呀。而且牛腩唔會太肥，牛筋亦夠口感，同麻辣汁好夾啊。呢度用既成set嘅公雞碗好有特色，而家出面好多餐廳都好少用啦。但我就覺得好正宗，而且好有懷舊嘅中國風味啊。雖然而家華香雞冇咁多分店，但嘢食嘅水準仍然係一流。而且雖然過咗咁耐，但佢既價錢一樣咁親民咁抵食，我以後放工都會多啲嚟食呀。