雪山冰廳

营业中

休息中

今日要去黄金买电脑，上网search下附近有咩好嘢食，发现有间翻新嘅冰室好多好评，「60年历史，新装修，新menu」咁话。揾呢间餐厅嘅时候，经过青山道嘉顿刚翻新嘅厂房写字楼，𠮶种「香港情怀」一涌而上。一边黑白色墙身好有怀旧感觉，一边白砖墙身加一幅颇有现代感嘅画。避风塘生炸脾 - 估唔到比怀旧炸鸡脾更好味，鸡皮烤到香脆无肥膏，啲肉又唔鞋，不愧为招牌菜之一。波士顿龙虾叻沙掺掺 - 估唔到只龙虾咁大只，而且都几多肉，卖相一流。掺掺系马来西亚油面同米粉「两沟」嘅菜色，油面粗粗而唔吸汁嘅口感，同吸汁嘅米粉配合下唔会太漏但又啖啖都有喇沙汤汁，好夹。海南鸡饭 - 海南鸡整得几嫩滑，两种酱都好正宗，忍唔住加多碗油饭，估唔到连油饭都好好食，我谂斋食油饭都可以食两碗。樽仔奶茶 - 又系招牌菜之一，茶胆香浓又够奶味，唔太甜又冰冻，好饮过一般嘅冰镇奶茶。茶走红豆冰 - 虽然唔系招牌菜，但我觉得呢个都系必叫嘅饮品。因为佢个奶茶底同樽仔奶茶有得挥，而且比起平时饮嘅红豆冰冇咁甜，好饮到我饮到一粒豆都冇得剩。