花華 (已結業)

馬鞍山並唔係無野食，只係維生級數以外既食店係少之又少，花華簡直係馬鞍山人既神級救命草。由手工意粉年代至而家改以麵包配搭主食，華花都無令人失望。足料、新鮮、人情味濃厚；連食具同環境配搭，都可以感受到店家對細節既追求。坦白講，自從知道花華唔再將火力集中晌手工意粉之後我失落左好一陣子，難得有一間餐廳既carbonara 係我會覺得好食，一夜間失去既感受實在不能言語。另一我好欣賞花華既地方係佢會採用大量本地食材，令我每一次食完都非常感謝本地漁農既付出。當時都有擔心無左手工意粉，花華會唔會只集中火力做糕點，無得享受佢既精彩主食呢？好彩，佢地只係將版圖轉移到麵包，而且見到餐牌上仲有一款手工意粉（不過極速售罄）。今日試左既本地盲鰽配辣沙沙醬，就係配搭一片外脆內軟又不失綿密質感既麵包，當堂令我信心返晒黎！加上盲鰽煎封後皮脆之餘又不失魚肉本身既鮮味，教我點可以唔叫花華做「神級綠洲」呢？😌