美心皇宮 (愛丁堡廣場)

营业中

休息中

好耐無嚟，仍然係咁多人，本地人，遊客都有。幸好早攞飛，只係等咗十令分鐘就有位。十一點過後，等位嘅，一大堆，有啲更索性坐係地下同細路玩。擺位開茶，好快手。大堂應該裝修過，不過最殺食仍然係一列面對維港嘅玻璃窗，有天然光，令整間酒樓好光猛。點心仍然係推車仔叫賣，偶然有師傅攞啲剛整好嘅小食周圍行。呢鋪開懷大吃，叫咗蝦餃、燒賣、叉燒腸、魚翅餃、迷你叉燒菠蘿包、臘味糯米飯、百花蝦丸、腐皮卷......總括嚟講，啲點心仍然唔錯，唔會令你失望得去邊。所以只係講兩個比較特別啲嘅。第一個係迷你叉燒菠蘿包，呢個好好味！一碟三個，師傅捧出嚟，重熱辣辣，菠蘿包的酥皮好鬼正！兩啖一個，嘩~~！第二個係糯米飯。應該唔係生炒，但臘味，香芹都齊，色香味俱全。秋風起，想食糯米飯，正好開齋。其實，香芹係帶起生炒糯米飯嘅靈魂，不過越嚟越少師傅會放，因為好多人唔歡喜個味道。話時話，邊道重有師傅會做生炒臘味糯米飯，而唔係蒸熟咗，再落料炒兩下呢？？呢餐點心BRUNCH，埋單一共三百八十幾。