鳥海山鐵板燒 (已搬遷) 新店位置

近排都係長沙灣返工，收咗工經常都同同事喺附近食嘢，無意中俾我哋發覺一間鐵板燒食物做得非常出色，而且價錢都好公道，所以喺度推介一下。鳥海山鐵板燒，地址喺長沙灣昌華街23號富華廣場地下18號舖。餐廳雖然唔算好大，但係裝修得好整潔，而且俾人感覺好舒適，如果坐喺廚師面前，仲可以欣賞佢嘅手勢，即場喺你面前製作。沙律份量雖然唔多,但係味道好清新作為開胃前菜真係最適合。大蝦，燒大蝦賣相非常好，加上廚師好細心將啲肉全部開晒出嚟，食落口啖啖肉，蝦肉仲係好新鮮爽口彈牙，鐵板燒燒出嚟嘅蝦肉仲帶點焦香，味道真係好正。最欣賞就係個蝦頭，將啲蝦膏燒香味道好香。比目魚，比目魚份量都好多，而且肉質好嫩滑，有少少魚油脂肪，食落去魚味香甜。牛柳，牛柳火候控制得啱啱好，牛肉味好香濃，肉質非常嫩滑多汁，最正就係加一片炸蒜片一齊食，可以令到牛肉味更加突出。油甘魚腩，魚腩油脂分布均勻，入口魚油味香，而且肉質仲好爽甜。三文魚腩，厚切嘅三文魚腩脂肪分布比例均勻，入口味道好新鮮，魚腩真係特別好食，又爽口又香。最後個炒飯，椰菜，配埋麵豉湯真係一絕，炒飯已經好香，加咗少少蝦乾，令到飯味道更加香，今晚餐晚飯真係好滿意，食材新鮮，廚師用心製作