尋麻記

营业中

休息中

返工前又到大埔搵食，行行下突然傳來陣陣麻香味，毅然發現香氣來自呢間小店，一於來趟「尋麻記」。小店以麻椒雞為主打，唔食辣嘅可以選擇麻香雞，亦有肥腸、小龍蝦尾、鳳爪及鴨掌等等，用黎加餸或作為佐酒小吃都非常合適。喜愛食辣嘅我當然要試招牌麻椒雞，老闆會即場將原隻雞拆骨拆肉，見到雞入面釀有大量辣椒粒及胡椒粒，非常足料，完成拆肉再用紙包得密密實實，好方便拎走。有別於一般手撕雞，麻椒雞入口更香，雞皮有彈牙嘅感覺，雞肉唔韌之餘亦醃得好入味，麻辣味十足，唔夠辣仲可以加埋餐廳秘製辣粉，食落更加惹味。另外亦試咗佢地嘅金牌肥腸，一分中肥腸份量都相當多，肥腸混合芫茜及辣汁，味道更有層次，碗底仲有大量嘅白芸豆，可以降低脂肪嘅吸收，咁就唔使驚肥啦。餐廳新張期內買滿一定價錢仲有飲品及現金券送，食完咁多辣嘢飲返包清涼飲品解辣一流。聽老闆講呢款麻椒雞係香港並唔普遍，今日有機會試到真係唔錯。