鬍鬚仔 (已結業)

青衣好少黃店，不過收到朋友通知喺長發有幾間黃店，呢日做完運動就走去醫肚啦！以前長發出晒名夜晚多小販檔，近年規劃過就搬返晒入室內，乾淨企理得多。聞說呢間鬍鬚仔黃到金，所以想嚟會一會。我嚟到既時候5點幾，正係落場時間，於是去長發商場行個圈再返嚟。原來長發商場都會有啲小攤檔賣啲小手作架！好耐無嚟呢邊啦！等到老闆同各位店員準備好，我就點咗個熟客大力推介既芝士漢堡套餐，除咗主菜漢堡，仲有湯或者汽水，再加小食。我揀咗是日黑松露湯同薯條。因為都係小店，所以會用即棄餐具，姑勿論呢個黑松露湯係罐頭定煮，我都覺得好有心，有幾可食快餐會有黑松露湯？熱辣辣，有陣陣黑松露香。再等即製既漢堡主菜，入面有好足料芝士，食落啖啖肉又juicy，而且配粗薯條真係無得彈，全部新鮮即製，好味到我全部食清光！店面雖然細，但都唔少文宣。我坐喺度食既幾個字，真係好多人嚟買餐，好羨慕住長發既居民啊！當日台灣大選，我食到咁上下就有結果出嚟，差不多可以肯定小英連任，老闆就立即做咗個新菜式嚟話要賀一賀佢！好有心！希望繼續加油努力呀！