醉鍋館 (已結業)

今晚公司老闆請食聖誕大餐，一早打咗電話去訂位，老闆點咗好多好正嘅食物。我地以為間火鍋店只係得打邊爐，原來有小菜食，仲可以自己諗菜式叫佢地煮。不過可能要有一定嘅人數先可以啦!!首先有一隻新鮮嘅大龍蝦，用黎做剌身，待應拎比我地睇個陣超生猛。龍蝦切成刺身 ，每一片晶瑩剔透，入口嫩滑鮮味，超正。墨魚刺身，墨魚夠大隻，墨魚切片後口感嫩滑卻很有咬勁，非常鮮味。椒鹽鮮魷，外層薄脆，酥化而不油膩，彈牙香口。潮式凍蟹，成隻碟咁大嘅花蟹我真係第一次食啦~隻蟹鉗成隻手咁大，食落口啖啖肉呀! 肉質鮮甜嫩滑。清蒸海班仔，有鮮味，肉質嫩滑。蛋白蒸皇帝蟹，蟹肉好鮮甜嫩滑, d蛋白吸收咗蟹味，味道十分正。老友鬼鬼，油炸鬼夠脆，蝦膠非常彈牙，啱啱上檯熱辣辣，食完想再食。鹽燒鮑魚，大大隻厚鮑魚，食到有少少咸，但未至於蓋過鮑魚本身既鮮甜，煙煙韌韌，唔難咬開。食咗餐咁豐富嘅晚餐，真係要多謝老闆好介紹啦~下次可以試下打邊爐。