Morton's of Chicago

老公book咗呢一間話趁住周年紀念日要試吓嘅扒房。不愧係五星級扒房，服務特別貼心。知道係我哋嘅周年紀念，特登為我哋準備咗唔少嘅surprise。一入到去，枱上面已經放咗兩張寫咗我哋個名嘅餐牌，同埋一張歡迎我哋嘅水彩畫。之後又同我哋影相，即刻print張相出嚟放喺一張簽滿晒所有Staff名嘅卡上面俾我哋作留念。🥰前菜嘅麵包係暖嘅，配埋佢哋自製嘅Butter cream，非常好味。同埋如果唔夠可以再添。Morton salad係有羅馬生菜加上一小片醃製魚塊作調味 。龍蝦湯好濃好鮮味Main Dish方面，我哋點咗Ribeye steak with New York Cut, 同埋羊架 。個肉眼扒非常之厚，係傳統美國式嘅牛扒，脂肪比例唔高，鍾意有趙口，肉質感比較強嘅人應該會鍾意 。我就比較鍾意個羊架，羊味十足，肉質嫩滑，但脂肪比較多，所以肉唔多。最後佢哋送上疏乎厘，上完枱吹完蠟燭之後，侍應就幫我哋分開兩碟。本身都唔錯，有少少雲呢拿醬汁，可惜佢哋都加咗糖漿，而呢個糖漿實在太甜啦，如果佢哋可以整得冇咁甜，或者甚至唔落會更好。