Cafe Paradise (杏花邨) (已結業)

同男朋友成日係柴灣食野真係食到有啲悶啦，所以就決定去杏花邨睇下有咩食，其實都好耐無去過杏花邨，行行下見到一間餐廳有個旋轉木馬，真係好靚呀，好似去咗啲樂園咁，所以就入咗去試下。見到餐廳都有好多種菜式揀，日式同西式都有。仲見到佢啲野飲都幾特別，所以都特登揀咗2杯嚟飲。我地叫咗2個晚餐set，包埋一個餐湯、主食同埋一杯野飲。個餐湯係忌廉粟米湯，都幾好飲。第一個主食叫鐵板黑椒牛肉芝士奄列飯，佢個汁都吾錯，撈埋啲牛肉同飯就好夾，再加埋個芝士奄列，一啖飯一啖蛋，冇得彈。第二個主食係香煎龍脷柳配巴黎牛油汁，一開始俾佢個巴黎牛油汁吸引左所以叫，黎完試左一下就知冇叫錯。佢有少少似咖喱汁，不過再加上啲香草同creamy嘅牛油，配埋煎到岩岩好嘅龍脷柳，絕配！最後吾可以吾提嘅就係個兩杯朱古力，一試難忘！先講個杯棉花糖朱古力，相信好多人都有飲過，但係我最欣賞嘅係佢有用火槍燒下面頭個啲棉花糖同朱古力粉，令到佢地有少少焦糖feel，有口感，有味道！第二杯係杯玫瑰花朱古力，真係唔識用字去形容。淡淡嘅玫瑰味緩和左朱古力本身嘅後勁甜，令到成杯野一啲都唔膩，睇到依度嘅你一定要試下！