松 (已結業)

今次又比朋友帶左去一間日本餐廳，先發現我偶爾都會經過果一度。佢門面個松字真係好大好吸引，基本唔會望唔到，不過我呢種低頭族就難講少少。除左門面，其實入面都明顯睇微出係好認真用心咁裝修過，比起門面更加吸引到我就係佢呢個咁骨子嘅環境。呢一個環境嘅配色其實好令到我可以放鬆咁喺度享受下美食。作為前菜嘅就係沙律，以醋調味其實好好，可以幫到我開一開胃，同埋佢呢種醋唔同外面嘅醋，果啲係會覺得太酸而令我有少少反感，而呢一種唔會。特選刺身丼呢一個丼包括左好多種刺身，種類多不在話下，味道亦都好唔錯架。其實我第一口係食甜蛋，因為話哂甜蛋係兒時嘅回憶嘛，但食左第一口，佢已經好吸引到我，佢嘅甜度淡淡地剛剛好。而呢一個丼最吸引到我嘅，一定係三文魚籽同海膽。我都比我朋友試過，佢都讚不絕口。佢啲三文魚籽個腥味唔重，令到佢好易入口，送飯亦都一流，比起出面某一啲係腥到不得了入唔到口嘅，佢真係高級好多。而海膽亦都係異曲同工，好有鮮味好好味。紅豆雪糕作為甜品登場，淡淡嘅甜度作為結尾，所以都好好食。久不久比朋友帶去食好西，花費多少不成問題，最緊要嘅好食。