南瀛水產

尖沙咀金馬倫道南瀛水產，之前已經聽過佢哋d食物好出名，今次放工約朋友去嘆番下。我哋今次點咗蕃茄沙律、雲丹蚧肉卷、深海池魚刺身、野菜天婦羅、日本涼拌海蜇、吉列炸蠔、活貝盛合、和牛粒炒飯、巨峰梳打及青蘋果乳酸。蕃茄沙律入面嘅蕃茄超juicy超新鮮，襯埋特製嘅醋汁及其他蔬菜食好開胃。雲丹蚧肉卷超好味最值得推介，新鮮蟹肉壽司上面鋪層滿滿嘅新鮮海膽，然後頂部再加一點黑松露，一啖食落去黑松露同海膽好夾好濃沃，加埋蟹肉嘅鮮，真係好味。深海池魚刺身就好新鮮，同埋魚肉好爽脆。野菜天婦羅就有唔同種類喺入面，南瓜、茄子、小粟米我都好喜愛。日本涼拌海蜇就比較濃味，海蜇非常新鮮。吉列炸蠔就炸得恰到好處，外脆內軟而且每隻蠔都超大肥美。活貝盛合就係其中一款招牌菜，包括帆立貝、蛤蜊、鮑魚、牡蠣四款，貝殼類海鮮每一款都超新鮮，而且職員會喺你面前即場燒畀你，然後剪埋落嚟畀我哋食。每樣都超有海洋嘅鮮味，真係食到停唔到。最後食埋和牛粒炒飯，用頂級和牛所以成個飯都有濃濃嘅和牛油脂味道滲出嚟。兩杯飲品就各有特色，鍾意飲乳酸嘅朋友一定會鍾意青蘋果嘅果酸味，巨峰梳打就有濃濃嘅提子味道。