低調高手大街小食

营业中

休息中

你到筲箕灣就一定要食佢嘅名物，除咗魚蛋粉就一定係呢間鋪頭。次次黎親都見到佢排隊。不過等候嘅時間都唔會夠出面成行成市嘅雞蛋仔專門店耐。每一次都會係5分鐘之內就有得食！價錢來講$18一底格仔餅其實真係算幾貴諗返起以前喺學校附近，$5底格仔餅就可以開開心心食住等車。算啦都10幾年前，呢啲嘢唔係日日食，食都要俾貴少少價錢懷念下。講番正題佢嘅格仔餅全部都新鮮熱辣整好，花生醬砂糖牛油唔會少，份量可以自己叫佢調整。一攞上手呢格仔餅係仲脆，有分！佢嗰漿唔會杰，令到格仔餅脆身得來唔會太實。食落仲有微微蛋香。最好就係朝早未食魚蛋粉之前同朋友分甘同味真係舔舔脷。雞蛋仔都唔錯不過好耐冇食。