貴德宮私房素宴

营业中

休息中

餐廳以私房菜形式經營，主打多款菜式嘅素食，嚴格把控食材同出品，亦會每個月更新菜單，而收費係以每位計算，記得要預先Book位。整體環境清雅，座位闊落，每枱都有個私人空間，無論係咪素食者都值得到訪。「翡翠千色拼盤」包含青瓜、高荀、水晶皮、中華沙律、柚子肉等食材，再加入素薰蹄、沙薑菇條、酸薑皮蛋同青檸伴碟。味道酸甜開胃，五顏六色，睇得又食得。「翠映金元寶」內餡飽滿，以翠玉瓜、蛋白、雞髀菇、素蟹柳混合而成，搭配西蘭花湯底都幾創新。「照燒釀金葫蘆」用黃瓜包住素肉餡，上面放上蛋黃沙律醬可增添口味。「芝香蘑菇批」混合素火腿、薯蓉同粟米粒粒，外層帶牛油香氣，超級酥脆，仲有拉絲芝士，個人十分喜歡。「姬松茸養生濃湯」飲落清甜順滑，裡面有紅蘿蔔同瓜，感覺幾滋潤。「椰香咖哩素雜錦」咖喱香甜入味，有彈牙素肉丸、椰菜花同豆卜，吸飽醬汁，點埋麵包好好味。「百寶海參花錦繡」包含蘆筍、燈籠椒、百合等，調味適中，配飯唔錯。「蟲草花油揚扒菜苗」夠新鮮且煮至軟身，健康又好味。最後以「石榴桃粒果凍」作結，甜度啱啱好，好Q好彈，整餐滿意度十足。