素一 (已結業)

最近試過幾間素食自助餐都感覺良好，作為非素食者既我，認為素食自助餐係一個幾好既嘗試。因為食物款式多，就算無肉類都唔會有「無啖好食」既感覺，而且新派素食比較貼近大眾口味，好容易接受。銅鑼灣呢間「素一」裝修以白色同輕柔色調為主，坐得好舒服。餐廳贈送既冰鎮咕嚕肉(素)糖皮好似拔絲咁脆，口感爽爽地幾得意；蟲草花粟米原盎湯口味清甜，無肉煲落去既湯無肥膏，相對黎講唔會肥膩，飲完覺得好清潤同舒服，身體零負擔。自助區：沙律吧、熱食、炸物、飲品等包羅萬有而且乾淨企理。小菜如炒四季豆、南乳炆蓮藕等味道唔錯；薑醋蛋浸得夠曬入味；最搞笑係有壽司。特別欣賞既係佢既豆腐係低糖的，飲得出有香濃豆味。甜品方面有焦糖燉蛋，但造法似中式燉蛋，加入左薑汁既。