The Oyster House (已搬遷) 新店位置

灣仔出名多美食，位於謝斐道有一間我覺得比較隱世嘅西餐廳，食物真的高質素！昏暗嘅燈光，特別適合情侶晚飯！本身都幾鍾意食生蠔，呢度有唔同國家出產嘅生蠔，可以單隻咁叫，另外只要點兩杯酒可以有生蠔優惠，都幾抵！今次叫咗日本同法國生蠔，新鮮！有淡淡嘅海水味，蠔肉清爽，高質！鐘意食蠔嘅朋友值得一試！湯方面我就叫左個黑松露野菌忌廉湯，佢似係約野菌直接打成湯，超級濃郁香甜，又唔會話好濟。意粉就揀咗炸軟殼蟹香草茄蓉扁意粉。佢嘅軟殼蟹一啲都唔厚粉，而且炸得香脆，加上特製香草同埋茄蓉酸酸甜甜，十分醒胃。主菜我就叫咗個香煎紐西蘭三文魚扒，出邊食成日會將個三文魚煎得過熟，令到肉質變得鞋，但係呢度控制火候啱啱好，外脆內軟，入口即溶。甜品就係唔係好多地方有得食嘅香蕉拖肥批。香蕉嘅清甜加上拖肥既口感夾埋一齊食個層次好豐富，食多兩舊都仲得。