Le Viet (已結業)

係旺角做完野，同男朋友係附近食飯，今晚想食東南亞菜，於是見銀行中心呢間Le Viet店面都幾四正，就試一試。越南餐廳對我黎說比較吸引既係佢既小食。當中蔗蝦就係我必食既。呢度既蔗蝦好大舊，啖啖都係蝦肉。吸收左蔗既清甜香味，真係正。另外我地加左個小食拼盆，一百蚊左右有4款小食，有燒豬頸肉、蝦餅、春卷同埋粉包。當中好推介豬頸肉，建議甚至可以單點一份。豬頸肉食得出好有炭燒味，而且好淋好有肉汁，點埋佢比既懞汁！其他幾樣都好食。男朋友叫左杯越式奶茶同埋一個海南雞飯，越式奶茶真係好東南亞，甜味同奶味都好濃。海南雞飯雞件好滑，時間掌握得好好，唯一係個飯唔夠香同埋份量比較少，但係好味既。我就叫左一個咖喱牛腩撈檬。放低見到好足料！上面有三，四舊好大舊好炸薯仔，加埋d咖喱汁好正，我覺得係成碗撈檬既亮點。牛腩份量都好多，淨係食餸都已經好飽啦。檬粉同咖喱汁好夾，成個檬粉係比較重口味既，但好正既！埋單兩人唔洗三百五，以比較高級既越南菜黎計，係幾抵既，都好飽有小小眼闊肚窄食唔哂，哈哈！