慈素小聚

营业中

休息中

爹哋媽咪一向喜歡食素菜，今次帶佢哋嚟尖沙咀一間新派素食，環境好寬敞舒適，而且店員都非常有禮貌。菜式選擇唔算好多，但賣相都好精緻，味道亦唔錯。✨香芒天婦羅炸豆腐 最喜歡嘅菜色！豆腐外層酥脆，內裡非常嫩滑。配上香甜芒果醬，好好味！✨京都片皮鴨 不得不佩服廚師手藝，豆製嘅片皮鴨像真度都幾高。配上三色椒，加上甜醬，再用薄薄但煙靭嘅皮包住黎食，不錯。✨椒鹽白靈芝菇白靈芝菇以椒鹽炸嘅方式，好脆身，食得好滋味。✨翡翠生菜包 唔係平平鹹鹹辣辣嘅生菜包，呢個嘅配料有雙色椒/沙葛/素肉碎等，酸酸甜甜，開胃之選。✨鮮竹蒸牛肉球 望落去真係幾可亂真，口感厚實，有少少芫茜香，咬落同平時嘅牛肉真係幾好似。✨日式長春卷 炸得金黃脆身，餡料有蘿蔔絲/木耳絲/蔬菜絲，蘸埋喼汁，好味。✨惹味冬陰功金邊粉/越南pho相比小食，麵食相對唔係太特別，不過味道都不錯。冬陰功金邊粉帶有微辣更啱我。✨雙色厚切多士 椰芒、香芋兩種味道。前者甜甜酸酸，椰絲加上芒果及柚子香；後者有芋頭及奶香。我哋仲叫咗養生嘅飲品，桂圓藍棗茶同蜂蜜薑茶。