靠得住粥麵小館 (康怡廣場北座)

营业中

休息中

今晚一家四口出去食晚飯，揀咗康怡廣場嘅 “靠得住”，地方異常寬敞，簡潔雅緻，光線充足，感覺好舒適。可以揀卡位或普通圓枱，亦有特色設計嘅半圓型卡位，高貴優雅，四個人圍住坐，啱啱好。爹哋鍾意食梅菜，點咗個惠州梅菜炆扣肉，都幾大碟㗎！梅菜同扣肉都炆得夠淋，可能係獨特配方，有種酸甜味，配白飯最啱。不過爹哋話，如果梅菜有啲趙口，更加過癮。馳名客家風味東江鹽焗雞一定要試下啦，要咗半隻，雞肉好嫩滑，份量都夠四個人食，鹹鹹香香，配埋啲醬汁，更提昇味道。我就喜歡魚湯海味粉絲雜菜煲 ，材料極之豐富，有大大隻蝦球、雪耳、雲耳、菇菌、蟹柳、粉絲、菜心、黃芽白及西蘭花，全部吸收咗魚湯味道，顯得更鮮甜美味。喜歡中式餸菜嘅爸爸，食埋碗白飯，非常滿足。一家人再嘆埋一壺蘋果紅茶，好清新蘋果味，淡淡透出茶香，清清味蕾，閒話家常，樂也融融。