其實老闆娘米線為荃灣區名店，雖然位於衛生程度堪稱惡劣嘅舊街市二樓，但係嗰日佢都會排長龍。
小弟並非第一日幫襯此店，要講下哩度食野既規矩。去到門口首要留意開門時間，因為係彈性上班制的，睇你彩數。講底人數之後店員就會安排你一個特定嘅排隊凳仔，再分發落單紙，請在左上方寫底你想佢今日點嗌你，大約係30度高溫底下等10至15分鐘，你就會有機會入閘。入閘前請自行開雪櫃取飲品。
入到間房仔會被安排同搭枱既人有親密既接觸，此時亦都會賞賜你享用超凍既冷氣。
佢既米線係即叫即煮既，大約等十五分鐘就可正式品嚐。
是日肚腩男叫左麻酸中辣金錢肚燒豬頸肉，等左十幾分鐘就會嗌名俾你。碗麵目測色調豐富，湯底有大量肉碎，濃厚得黎配上大量香料。佢食材用料亦係唔錯既。食過幾次，小弟都覺得佢味道略為偏鹹。
價錢方面，佢算係中價米線，兩餸連野飲都60, 不過份量十分充足。
總結佢如果你想去朝拜，就要有去澳牛食光速餐嘅心理準備。
